अभिषेक
नसावे उजाळ वाळवंट
अशा तुझ्या कपाळावर
पेरली आहेत काटेरी झुडपं.
डोळे आसवे गाळतात या आशेने
अश्रुंची फुले होतील
टवटवीत गालांनाही वाटतं
ते ओठ ही फुले टिपतील.
तुझ्या हातांचं नशीब-
खरकटी उरकताना जख्माळतील
त्यांच्या हातांचं नशीब-
तुझ्या छातीवर पहाड फोडतील.
अवसप्यालेल्या तुझ्या आभाळावर
कुंकवाचा चंद्र त्यांनी उगवूच दिला नाही
कुंवारपणाचा अभिषेक करून
त्यांनी तुला गर्भार केलं
हे सांगशील काय याच गर्भाला
परतीच्या वाटा न विसरता
पिसाटांचे चक्रव्यूह भेदणार्या अभिमन्यूला.
अशी रडत बसू नकोस
सीता-द्रोपदीसारखी
तू फुलन होऊन दाखव
किंवा हो तस्लिमा नसरीन
नराधमांच्या लिंगांना छाटणारी संगीन!
- कलाम अहमद खान,नागपूर
मो.९६५७३४७६८८
कोणत्याही टिप्पण्या नाहीत:
टिप्पणी पोस्ट करा