“वाचनगंध” — शब्दांच्या सुगंधातून उमलणारी क्रांती.

 *“वाचनगंध” — शब्दांच्या सुगंधातून उमलणारी क्रांती..*

वाचन ही कृती नसून संस्कृती आहे आणि त्या संस्कृतीला नवा प्राण फुंकण्याचं कार्य लेखिका प्रीती जगझाप यांनी “वाचनगंध” या त्यांच्या चित्रकथेतून केलं आहे.ही कथा म्हणजे बालमनाच्या अंतःकरणात जागा होणाऱ्या ज्ञानाच्या ज्योतीची गोष्ट आहे.

अथर्व आणि आरोही ही दोन नावे जरी लहान वाटली, तरी त्यांच्यात एक मोठा अर्थ आहे.तो म्हणजे “वाचन हीच क्रांती, सृजन हीच साधना.”शाळेच्या चिखलात उगवणारी ही दोन फुलं आपल्या संवेदनांना सुगंधित करतात. बाईंच्या प्रेरणेने त्यांच्यात जो वाचनाचा पेटलेला ज्वालामुखी तो फक्त पुस्तकापुरता नाही तर तो विचारांच्या अभ्युदयाचा आरंभ आहे. “कोण बनेल वाचनवीर” हा उपक्रम म्हणजे अक्षरांचा उत्सव आणि मुलांच्या कल्पनाशक्तीचं जनमस्थान आहे.प्रीती जगझाप यांच्या लेखणीत एक आश्चर्य आहे. साधेपणातून झरतं सौंदर्य आहे. त्यांच्या ओळींमध्ये ध्वनी नाही, पण अर्थाचा घणाघात आहे.त्या वाचनाला खेळ बनवतात, आणि खेळाला विचार. मुलं कविता लिहितात, चित्रं काढतात, आणि शेवटी त्या शब्दफुलांचा सुगंध गावभर दरवळतो.मंत्र्यांच्या कार्यक्रमात हार फुलांना खूप महत्त्व दिल्या जाते.पण शेवटी फुलांच्या सुगंधापेक्षा शब्दांचा सुगंध अधिक काळ टिकतो ते मंत्रीमहोदयांना पटल आहे.तोच सुगंध मंत्रीमहोदय आपल्या सोबत घेऊन जातात हे ही त्यात नमुद केलं आहे."शब्दफुलांचं महत्त्व अधिक काळ टिकतो" ही ओळच या कथेचं आत्मसुत्र आहे.

वाचणगंध या पुस्तकातून मुलांच्या सर्जनशीलतेला नवी दिशा मिळत आहे. मुलांचे प्रोत्साहन आणि कौतुक करून लेखिकेने त्यांचा आत्मविश्वास वाढविला आहे. लेखिकेने वाचनाला केवळ एक छंद न मानता ते जीवन समृध्द करणारे साधन म्हणून पाहीले आहे. या पुस्तकाची भाषाशौली साधी सरळ आणि ओघवती आहे. वाचनाचा आनंद आणि यातून निर्माण होणारे विचारप्रवाह वाचकांपर्यंत प्रभावीपणे पोहचतात, लेखिकेने विषयाची निवड अर्थपुर्ण आणि प्रेरणादायी मांडली आहे. वाचनसंस्कृती वाढविण्याचा कटाक्ष प्रयत्न यात दिसून येत आहे.वाचकाला विचार करायला लावणारी मांडणी यात आहे.वाचणाची गोडी वाढवू इच्छिणाऱ्यांसाठी वाचनगंध ही एक मार्गदर्शन आणि प्रेरणादायी कथा आहे.ही कथा म्हणजे वाचन संस्कृतीचा बालमहाकाव्य आहे.

जिथे बाईंची प्रेरणा म्हणजे झाड, आणि विद्यार्थ्यांचे प्रयत्न म्हणजे फळं आहे असं ही कथा शिकवून जाते. 

         वाचाल तर वाचाल!

       शब्दांतून विचार जन्मतो,                              

        विचारांतून समाज घडतो.

 

प्रीती जगझाप,यांच लेखन म्हणजे

म्हणजे पाण्याच्या थेंबातून झऱ्याची निर्मिती.त्यांच कार्य म्हणजे मुलांच्या मनात पेटवलेली अक्षरज्योत जी एके दिवशी समाजाचा दीप बनेल.अशा

शब्दकन्येला माझ्या मनःपूर्वक शुभेच्छा तिच्या प्रत्येक चित्र कृतीतून प्रत्येक विद्यार्थी असाच फळू दे नी फुलू दे..

- संगीता बांबोळे-बोरकर,

गोंडपिंपरी,चंद्रपूर

 Mo.9405718463